حسام عبدالمجيد يرد على أنباء انتقاله للأهلي في يناير: الناس معذورة

رد حسام عبدالمجيد، لاعب فريق لودوجوريتس البلغاري، على ما تردد حول إمكانية انتقاله للنادي الأهلي خلال فترة الانتقالات الشتوية المقبلة، في ظل احتياج المارد الأحمر لمدافع خلال يناير المقبل، عقب الهجوم الذي شهدته الجولة الأولى ضد عمرو الجزار وهادي رياض.

وقال عبدالمجيد في تصريحات تليفزيونية: «والله أنا سامع موضوع إني أرجع مصر وأنتقل للأهلي ده من ساعة ما موضوع إني هحترف في بلغاريا ظهر وبيقولوا إني طالع كوبري والكلام ده ولكن الحمد لله، أنا أصلًا ما كنتش بفكر في حاجة زي دي؛ لأن طموحي بقاله 3 أو 4 سنين إني أسعى للخطوة دي وأول ما الفرصة جت، صدقتها، والناس كلها القريبة مني ممكن تأكد الكلام ده».

حسام عبدالمجيد يطالب بثقة جماهير الزمالك

وتابع: بس الناس معذورة في كل حاجة بتقولها؛ لأنهم ما شافوش لعيب من النادي طلع يحترف ورجع تاني، وشفنا طبعًا مصطفى محمد، وبسم الله ما شاء الله ربنا كرمه، ولعب في نادي كبير في أوروبا وراح لنادي تاني كبير في أوروبا بس هم معذورين برضه ما ادونيش الثقة الكاملة إنهم يثقوا في إني ممكن أروح نادي كبير، وأثبت نفسي أكتر، وأفتح أبواب تانية للاعيبة ناشئين كتير موجودين في الفرقة.

وأكمل: عندنا لعيبة كتير ممكن تطلع تحترف في أوروبا، وده مش ليا أنا لوحدي، بالعكس، الموضوع ده كويس لمنتخب مصر كمان، لما يطلع من النادي 3 أو 4 أو 5 لعيبة يحترفوا في أوروبا، ده شيء كويس، وممكن بدل ما يطلع من النادي 3 أو 4 لعيبة، يطلع 6 أو 7 لعيبة كمان بعد كده.