فاروق جعفر: الزمالك أبلغ نجلي «سيف» بالرحيل.. ومش عارف ليه بيمشوا ولاد النادي

كشف فاروق جعفر، نجم الزمالك ومنتخب مصر السابق، تطورات موقف سيف جعفر، لاعب وسط الفريق الأول لكرة القدم بالقلعة البيضاء، بعد غيابه عن معسكر الإعداد الأخير.

وقال فاروق جعفر في تصريحات خاصة لـ«الوطن»: «سيف خرج من المعسكر من أول امبارح بالفعل ومش عارف ليه، هو كان فيه مشكلة مع جون إدوارد الموسم الماضي، والمفروض لو هيمشوه ليه قيدوه في القائمة من الأول خالص؟».

وأضاف: «مش عارف ليه بيمشوا ولاد نادي الزمالك، طالما فيه عقد مع النادي هيدخل معاهم في مشكلة، وإحنا مش عايزين مشاكل أبدا مع الزمالك».

وتابع نجم الزمالك السابق: «فيه كلام مش هينفع أقوله وأتكلم فيه، ولكن لو روحتوا اتحاد الكرة اسم سيف موجود في القائمة بشكل طبيعي».

واختتم فاروق جعفر: «أنا مستغرب من القرار، ولكن ما أعرفش سببه إيه»، مؤكدًا أن موقف اللاعب يثير علامات استفهام، خاصة في ظل وجود اسمه ضمن قائمة الفريق.