أحمد شوبير يهاجم شيكو بانزا بسبب غيابه عن معسكر الزمالك: «لاعب مزاجنجي»

فتح الإعلامي أحمد شوبير النار على الأنجولي شيكو بانزا، جناح الفريق الأول لكرة القدم بنادي الزمالك، بسبب استمرار غيابه عن معسكر إعداد الفريق المقام في العاصمة الإدارية، مؤكدًا أنّ اللاعب بات يُثير الكثير من علامات الاستفهام بسبب تأخره المتكرر في العودة كلما غادر البلاد.

أحمد شوبير: شيكو بانزا لاعب مزاجنجي

وقال شوبير، خلال تصريحات إذاعية عبر برنامجه «مع شوبير» المذاع على «أون سبورت إف إم»: «شيكو بانزا ده غريب جدًا، وموضوع تأخيره كل مرة يسافر فيها بقى أمر معتاد، يعني كل شوية عنده حكاية جديدة ولاعب مزاجنجي، مرة تلاقيه بيرقص ومبسوط، ومرة تلاقيه متضايق، ومحدش بقى قادر يفهم هو عاوز إيه بالظبط».

وأضاف: «اللي مستغربه إنّ الزمالك داخل في معسكر إعداد للموسم الجديد، واللاعب لحد دلوقتي مش موجود مع الفريق، لما المسؤولين كلموه قالهم إنه موجود في لشبونة بالبرتغال ومستني يخلص إجراءات تجديد الإقامة، لكن أنا بصراحة مش فاهم إقامة إيه، الراجل في إجازة بقاله شهر، وكان عنده وقت كافي يخلص كل إجراءاته ويرجع ينتظم مع زملائه».

موعد عودة شيكو بانزا إلى تدريبات الزمالك

واختتم شوبير تصريحاته قائلًا: «بانزا أبلغ مسؤولي الزمالك إنه هيعود يوم 7 أو 8 أغسطس الجاري، علشان ينتظم في التدريبات، لكن في النهاية المطلوب إن اللاعب يلتزم بمواعيده ويبقى موجود مع الفريق في الوقت المحدد، لأن الاحتراف له قواعد لازم الكل يحترمها».