«أنا شريك الأهلي في صفقاته».. رئيس نادي إنبي يطلق 8 تصريحات قوية

أطلق أيمن الشريعي، رئيس نادي إنبي، 8 تصريحات قوية في ظهوره الإعلامي بعد تسلمه جائزة أفضل قطاع ناشئين في مصر.

وقال الشريعي خلال ظهوره بقناة أون سبورت: الأهلي فاوضنا لضم شكشك بس قلت للاعب الفلوس اللي جاية مش قيمتك أنا بحب اللاعب بتاعي وهو رايح النادي يكون طاير في الهوا في طريقة وإجراءات انتقاله وليس في الفلوس نهائيا فالطريقة وكل شيء ما كانتش أفضل حاجة.

وتابع: عقود علي محمود وأقطاي عبدالله مع الأهلي هكسب منها دايما وطول ما الأهلي بيكسب أنا بكسب برضه وأنا شريك معاهم في الصفقات.

الشريعي يحسم مصير كهربا مع إنبي

وأكمل: كهربا كابتن فريق إنبي اللي هياخد الفريق لحتة تانية بس لازم تفهموا لو مفهمتوش الأمر هيكون مختلف ويحتاج لطريقة معينة في التعامل وهي التقدير وهو من أجمل وأجدع لاعيبة الكورة اللي تعاملت معها وأنا من المحظوظين اللي كهربا جه في عهده وهيكون ليه الدور الأعظم الموسم المقبل.

وأردف: انضباط حلمي طولان تسبب في عدم استمراره في إنبي لأنني كنت أعمل بطريقة لا تمشي مع الانضباط في هذا التوقيت.

وأكمل: علي محمود وأقطاي عبدالله اعتقد يكونوا متواجدين في قائمة منتخب مصر في بطولة أمم أفريقيا وعلي محمود شيء مختلف تماما ولو كلمني في الخامسة صباحا سأرد عليه هو أمره مختلف تماما معايا وكان ينتظر كلمتي فقط في اتفاق الأهلي.

واختتم: زياد كمال ما زلت مصمم إنه صفقة كويسة جدا وهفضل مصمم على الرأي ده دايما ولو شاركت في دوري أبطال أفريقيا أو الكونفدرالية أخسر بسبب التنقلات والسفر وكل ده هكسب لو خدت البطولة وأنا مش هاخد البطولة وبقول للاعبين دايما اللي جاي إنبي عشان أهداف مالية لا يأتي لنا لأننا بتوع فنيات فقط وليس أموال.